زجل : الظالم و المظلوم - الحسن درويش (فيديو)

من ديوان الزمان المكَلوب

الظالم والمظلوم

ياغَضَب لا تْحوم عْلى سْفينتْنا
راهْ القُهْرة ولاّت مْعيشتْنا
والظّلْمة دَمْعة سايْـلة فْ عينينا
والحُكم تْقاضى وسْنين عَدَّت عْلينا
يا سَجّان حَلّْ بْوابك عْلينا
عْباد ظالْمة وعْباد فْ حَقّْها مَظْلومة
عْباد طاغْية وعْباد فَ عْقولْها مَلْهومة
عْباد حادّة وعْباد بَلسانْها مَرْحومة
عْباد زايْرة وعْباد فَ قْبورْها مَنْضومة
هذا انْتَ هاذو انْتُمَ
وهاذو عْبادْ بَمْصيدة مَحْكومة
هذا انْتَ هاذو انْتُمَ
راغْبينْ فْ جَلاّد بَسْياط مَرْقومة
يا جلاد يا جلاد
يا العالي شوفْ ف لَعْباد
انْتَ منّي وانا مَنَّك
ولَخْديعَة وْرا ظَهْرَك
انْتَ دَمّي وانا دَمَّك
ولَوْزيعة دِرْها فْ غَنْمَك
رْواح اليوم بَشْهودَك
يِبانْ الحق وعْيوبَك
والبارَح كان حَضَّك
والنّوبة غابْ سَعْدَك
فينْ حْضانَك اللي من صلْبَك
طْفَل كْبَر وفَرّْ مَنَّك
الظرفْ عْواج عْلى زْمانَك
فين الهَمة وفين شانَك
عْراضوا كْتافَك عْلى ذاتَك
وجْبينَك سال بْ عَرْقَك
شَلاَّ نْظيف واقَف دَرْبَك
والوَسْخه وَلاَّتْ مْدادَك
يا جلاد يا جلاد 
يا العالي شوفْ فْ العْباد
هَاكْ انْتَ وفينْ انْتَ هاذي خُلْطَه ذْكَرْ وانْثَى
هاكْ انْتَ وفينْ انْتَ هاذي حكمة وسر مْشى
يا جلاد يا جلاد 
يا العالي شوفْ فْ لَعْباد