سرسري و الحال ما صبح
لا حول ولا قوة الا بالله .بقيت نحشم نقول انا راجل #الضاوية،و وليت نعگز نكتب عليها و نعاود لعباد الله على المغامرات ديالها.شحال قدك من استغفر الله يا البايت بلا عشا.
جبت مووووودة و انا داير احتجاب على الكتابة غي لاكووون ولاحادر لمراة تريگل راسها وتشد لرض،ولكن هيهاااااات ثم هيهااااات راه ماحدها تقاقي و هي تزيد فالبيض ،لا حياة لمن تنادي .
المناضلة الضاوية هاذ ليامات مشغولة بزااااف غي مع المحاكم و البوليس و ماجاورهما .
المشكلة ماشي فكونها تدير التبرزيط و لا ولات من صحابات السوابق.لا لا المناضلة الضاوية بعيدة كل البعد على هاذ المونتيفات.
قالك يا سيدي الضاوية قدمو بيها شكاية على اساس انها كاتحل للبايرات عينيهم،دخلنا عليكم بالله واش باقي شي واحد عينيه مبلعين فهاذ لوقيتة ؟؟؟
في حق الله الضاوية المطالب ديالها مشروعة باغية تزوج بناتها ومن بعد تزوج البايرات اللي دايرات فالساحة الوطنية،واش قالت شي عيب؟؟اللهم ارحمني عاد ارحم واليديا.
الضاوية من كثرة قسوحية الراس و التفلسيف اللي تعلمت،ومن حيث حتى هي ولات مناضلة عبر شبكات التواصل(وهاذي غادي نولي للمغامرات ديال لالة مولاتي الضاوية) دارت حتى هي حملة عبر الفايس بوك ديال #كلنا_الضاوية.
يا ودي يا النضال يا ودي.الله يرحم ايام المرحومين مين كانت غي تثاوب فوسط المجمع التهمة راكبة،"التحريض على التظاهر" ياك التثاؤب مرض معدي،ايوا مين يتثاوبو كلهم اش جا ما يسكتها يا البشير.
المهم الله يسلك الطرح على خير
#عمي_بوجمعة
إرسال تعليق